Një ngjarje e rëndë tronditi provincën e Caserta-s, në Itali, sot mëngjes herët (9 tetor 2024), kur një shqiptar vrau gruan e tij në sy të dy fëmijëve të tyre të mitur. Ngjarja ndodhi në San Felice, ku 30-vjeçari shqiptar, Lulzim Toci, punëtor bujqësie në zonë, në kulmin e një debati, mbyti gruan e tij 24-vjeçare, Eleonora, sipas mediave italiane, përfshirë “La Repubblica”. Fëmijët e çiftit, të moshës 4 dhe 6 vjeç, ishin dëshmitarë të kësaj tragjedie.

Pas ngjarjes, Lulzim Toci u arrestua nga policia. Autoritetet raportojnë se ai u gjet para banesës së tij, në gjendje të rënduar psikologjike. Depresioni, nga i cili vuante kohët e fundit, po hetohet si një nga shkaqet kryesore të krimit, megjithëse hetimet për motivet e sakta janë ende në vazhdim.

Eleonora kishte shkuar në Itali vetëm një muaj më parë. Pas incidentit, kunata e Lulzimit u informua për ngjarjen përmes një videothirrjeje nga fëmijët, të cilët i treguan asaj çfarë kishte ndodhur. Ajo u përpoq të kërkonte ndihmë për të dërguar viktimën në spital, por fatkeqësisht ishte tepër vonë. Policia u lajmërua nga motra e Eleonorës, e cila telefonoi autoritetet, që më pas arrestuan 30-vjeçarin pranë banesës së tij. Hetimet për këtë ngjarje tragjike po vazhdojnë.