Një ngjarje e rëndë me pasojë vdekjen ka ndodhur pasditen e sotme në Tiranë, ku një konflikt mes kolegësh ka përfunduar tragjikisht.

Viktima është Indrit Ismaillari, 34 vjeç, i cili u qëllua me thikë nga kolegu i tij, Filip Shehu, 41 vjeç. Ngjarja ka ndodhur rreth orës 15:30 në ambientet e lokalit “City Lounge”, në zonën e Komunës së Parisit, ku të dy punonin – njëri si kuzhinier, tjetri si picier.

Sipas burimeve, pas një debati për motive të dobëta, Shehu ka nxjerrë një thikë kuzhine dhe e ka goditur tre herë 34-vjeçarin, duke e lënë të plagosur rëndë. Pavarësisht ndihmës së menjëhershme dhe transportit drejt spitalit, Ismaillari nuk mundi t’u mbijetonte plagëve.

Hetimet paraprake tregojnë se konfliktet mes dy kolegëve kanë qenë të vazhdueshme, ndërsa 41-vjeçari ka deklaruar se ishte bullizuar nga viktima.

Autori është arrestuar nga policia, ndërsa grupi hetimor po punon për të sqaruar plotësisht rrethanat e vrasjes dhe motivet që çuan në këtë akt të rëndë.