Një makinë e djegur është gjetur ditën e sotme në fshatin Postribë të Shkodrës, vetëm pak orë pas atentatit me lëndë plasëse ndaj punonjësit të Tatimeve, Enea Busukja.

Sipas burimeve nga policia, mjeti i djegur, një “Volkswagen”, është zbuluar rreth orës 12:20 në fshatin Dragoç, në anë të rrugës. Dyshohet fort se kjo makinë është përdorur nga autorët e sulmit me tritol dhe më pas është djegur për të humbur gjurmët.

Nga atentati i mëngjesit të sotëm, Busukja mbeti i plagosur, por ndodhet jashtë rrezikut për jetën në spitalin e Shkodrës.

Në vendngjarje ndodhen forcat e policisë dhe grupi hetimor, të cilët po punojnë për verifikimin e lidhjes mes mjetit të djegur dhe atentatit, ndërsa vijon kontrolli i zonës për prova të tjera që mund të çojnë në identifikimin e autorëve.