Presidenti serb, Aleksandër Vuçiç, ka pranuar se Serbia ka gabuar duke votuar pro rezolutës evropiane në Asamblenë e Përgjithshme të Kombeve të Bashkuara që mbështet Ukrainën dhe integritetin e saj territorial. Ai ka kërkuar falje nga qytetarët serbë dhe ka marrë përgjegjësinë për këtë veprim, duke thënë se ishte i lodhur dhe i rënduar dhe nuk mund të merrej me të gjitha vetë.

“Mendoj se Serbia ka bërë një gabim, për këtë u kërkoj falje qytetarëve dhe fajin e kam vetë, sepse ndoshta jam i lodhur dhe i rënduar dhe nuk mund t’i bëj të gjitha vetë. Siç mund ta shihni, unë po e them këtë në një kohë kur është fare e qartë se do të humbas favore apo pikë politike në BE për shkak të kësaj. Mendoj se Serbia duhet të ishte përmbajtur. Nuk kam askënd tjetër për të fajësuar përveç vetes, nuk kam pasur kohë të merrem mjaftueshëm me të.”

Në një intervistë për mediat serbe, Vuçiç ka deklaruar se delegacioni serb në OKB duhej të kishte abstenuar, siç kishte bërë për rezolutën e Shteteve të Bashkuara që kërkonte një fund të menjëhershëm të luftës pa e cilësuar Rusinë si shtet agresor. Ai ka theksuar se Serbia nuk do të përmbysë politikën e saj në lidhje me këtë çështje me një apo dy rezoluta dhe se Beogradi ka refuzuar të vendosë sanksione ndaj Moskës, ndryshe nga vendet perëndimore.

Rezoluta e miratuar nga Ukraina dhe aleatët e saj evropianë mori 93 vota pro, 18 kundër, përfshirë SHBA-në dhe Rusinë, dhe 65 abstenime.