Presidenti serb, Aleksandar Vuçiç, deklaroi se hyrja e përbashkët dhe njëkohësisht e të gjitha vendeve të Ballkanit Perëndimor në Bashkimin Evropian është “zgjidhja më e mirë dhe më e drejtë” për rajonin. Ai bëri të ditur se këtë propozim do t’ia paraqesë zyrtarisht presidentes së Komisionit Evropian, Ursula von der Leyen, gjatë takimit të së mërkurës.

Duke folur në panelin e forumit BELTALKS: Bisedimet Ekonomike të Beogradit organizuar nga GLOBSEC, Vuçiç ngriti pikëpyetje rreth logjikës së anëtarësimit të pjesshëm në BE.

“Nëse pranoni një, dy ose tre prej nesh, çfarë do të ndodhë me pjesën tjetër? Si do ta trajtojmë këtë? Si do t’i zgjidhim të gjitha çështjet e pazgjidhura?”, u shpreh ai.

Sipas Vuçiç, një hyrje e fragmentuar e vendeve të rajonit do të krijonte tensione të reja dhe sfida të panevojshme, ndërsa pranim i përbashkët do të siguronte stabilitet afatgjatë.

Ai shtoi se ideja nuk është vetëm çështje rajonale, por lidhet drejtpërdrejt me të ardhmen e kontinentit.

“Kjo ka të bëjë me të ardhmen e rajonit, por edhe me të ardhmen e Evropës. Nëse dikush dëshiron të kuptojë gjeopolitikën, kjo është e vetmja gjë që BE mund të bëjë – të na pranojë të gjithëve së bashku, pa kufij mes nesh.”

Vuçiç theksoi se do ta prezantojë publikisht këtë propozim edhe para presidentit të Këshillit Evropian, Antonio Costa, duke theksuar se sheh vetëm “aspekte pozitive” në një qasje të tillë.