Pas një pritjeje të gjatë, Xhamia e Namazgjasë, e cila konsiderohet xhamia më e madhe në Ballkan, u inaugurua sot në një ceremoni zyrtare ku morën pjesë Kryeministri Edi Rama dhe Presidenti turk, Recep Tayyip Erdogan. E ndërtuar mbi një sipërfaqe prej 10 mijë metrash katrorë, xhamia pritet t’i shërbejë 10 mijë besimtarëve myslimanë njëherazi. Themelimi i saj u hodh në vitin 2015, ndërsa kujdestari i parë i këtij tempulli të madh fetar do të jetë kryemyftiu i Tiranës, Bilal Teqja.
Kryeministri Rama shprehu falënderime të përzemërta ndaj Presidentit Erdogan dhe popullit turk për ndihmën e tyre në ndërtimin e kësaj xhamie, duke e cilësuar si një simbol të miqësisë së fortë dhe të lidhjeve të pazgjidhshme mes dy popujve. “Në këtë shtëpi të vogël të përbashkët me shumë banorë, ju, zoti president, na keni dhënë mjetet e nevojshme për ndërtimin e kësaj xhamie, që flet për lidhjen e fortë mes shqiptarëve dhe turqve,” u shpreh Rama.
Ai gjithashtu uroi kryemyftiun Bilal Teqja për rolin e tij të ri si kryekujdestar i këtij tempulli, duke shtuar se ky vend adhurimi do të shërbejë si një qendër e rëndësishme për myslimanët e Shqipërisë.
Nga ana e tij, Presidenti Erdogan e cilësoi Xhaminë e Namazgjasë si një simbol të miqësisë dhe solidaritetit mes Shqipërisë dhe Turqisë. Ai theksoi se kjo xhami, përveçse një objekt kulti dhe adhurimi, është konceptuar si një kompleks multifunksional. Brenda saj gjenden salla për konferenca, bibliotekë dhe dhoma studimi, si dhe ashensorë për personat me aftësi të kufizuara. Erdogan shtoi se objekti është pjesë e një projekti që synon të pasqyrojë trashëgiminë e pasur kulturore të Shqipërisë, duke përfshirë dhe një muze për bashkëjetesën e kulturave ballkanike.
Ai theksoi se ndërtimi i xhamisë është një dhuratë nga populli turk për vëllezërit dhe motrat e tyre myslimanë në Shqipëri, me mbështetjen e entit turk të çështjeve fetare dhe fondacionit Diyanet. Në ceremoni morën pjesë dhjetëra besimtarë, të cilët tashmë kanë mundësinë të falin namazin në një prej xhamive më të mëdha në rajon, e cila mund të presë deri në 10 mijë besimtarë njëkohësisht.
