Mesfushori i Kombëtares shqiptare, Ylber Ramadani, nuk do të jetë i gatshëm për dy ndeshjet e muajit shtator, për shkak të një problemi shëndetësor.

Fillimisht ishte klubi italian Lecce që dha sinjalet për mungesën e tij, ndërsa së fundmi lajmi është konfirmuar zyrtarisht nga FSHF. Sipas njoftimit, Ramadani vuan nga një infeksion i përsëritur në laring, i cili kërkon trajtim me terapi antibiotike dhe pushim absolut.

Kjo gjendje nuk i lejon mesfushorit kuqezi të jetë në fushë për miqësoren ndaj Gjibraltarit më 4 shtator dhe përballjen vendimtare me Letoninë më 9 shtator, në kuadër të eliminatoreve për Botërorin 2026.

Mungesa e tij konsiderohet një goditje për mesfushën e Kombëtares, ndërsa stafi teknik pritet të vendosë së shpejti për zëvendësuesin e tij në listën kuqezi.