Komisioni i Rithemelimit ka thirrur një mbledhje në selinë e PD-së mesditën e sotme, rreth orës 13:00, ku pritet që të diskutohet mbi zhvillimet e fundit politike.

Në fokus të kësaj mbledhje pritet që të jetë qëndrimi që do të mbahet në raport me ambasadoren amerikane Yuri Kim, e cila gjatë ditës së djeshme pati një takim me Enkelejd Alibeajn, të cilin e njeh si kryetar të komanduar të PD-së.

Nga ana tjetër sot Gjykata e Tiranës zbardhi vendimin e datës 25 Mars, i cili njeh si të ligjshëm Kuvendin e 11 Dhjetorit, dhe si organ drejtues të PD-së Komisionin e Rithemelimit.

Në vendim thuhej se gjyqtari Agron Zhukri, ka kryer një seri verifikimesh, mbi legjitimitetin e kërkesës së Rithemelimit, cilësisë së anëtarëve të Këshillit Kombëtar dhe përputhshmërinë e Statutit të miratuar nga anëtarësia në 11 Dhjetor 2021 me normat ligjore.

Gjykata ka arritur në konkluzionin se kërkesa e Komitetit të Rithemelimit është në përputhje të plotë me ligjin dhe për këtë arsye ajo duhet pranuar.

Gjykata rithekson se nuk ka rol aktiv në emërimin, ndryshimet apo shkarkimet e organeve drejtuese të partive politike, pasi kjo gjë u takon vetë strukturave të organizatave.