Të tjera detaje janë zbardhur lidhur me plagosjen me armë zjarri që ndodhi mbrëmjen e së dielës në zonën e Institutit, në Tiranë. I plagosuri, Marilen Jata, është qëlluar me armë zjarri, ndërsa plumbi e ka kapur në këmbë, duke e lënë jashtë rrezikut për jetën.

Sipas informacioneve të siguruara autori i dyshuar është Fatmir Frroku, shoku i të plagosurit. Dyshohet se ngjarja ka lidhje me një konflikt të mëparshëm mes tyre, i cili daton disa muaj më parë.

Nga hetimet paraprake, rezulton se Frroku i është shfaqur Jatës papritur në rrugicën ku ai banon, në momentin kur po shkonte drejt shtëpisë. Përplasja verbale ka degjeneruar në përdorim arme zjarri, duke përfunduar me plagosjen e viktimës.

Oficerët e policisë pritet të marrin në pyetje Jatën në Spitalin e Traumës, me qëllim zbardhjen e plotë të motiveve dhe natyrës së konfliktit mes dy personave.

Ndërkohë, Policia e Shtetit ka bërë një deklaratë zyrtare:

“Falë veprimeve të shpejta hetimore, u bë e mundur identifikimi i autorit të dyshuar të ngjarjes, shtetasit F.F., 36 vjeç, i cili, pas një konflikti për motive të dobëta, rreth orës 22:20 të mbrëmjes së djeshme, plagosi me armë zjarri në këmbë shtetasin M.J. Ky i fundit ndodhet në spital, aktualisht jashtë rrezikut për jetën. Vijon puna intensive për kapjen e shtetasit F.F. dhe dokumentimin e plotë të rastit. Materialet i kaluan Prokurorisë, për veprime të mëtejshme procedurale.”

Policia po vijon operacionin për kapjen e autorit të dyshuar, ndërsa hetimet për ngjarjen mbeten në zhvillim.