Të tjera detaje kanë dalë në dritë lidhur me ngjarjen e tritolit të vendosur pranë një lokali në zonën e Kamzës, ku policia vuri në pranga tre persona: Jeton Lami, Florin Domi dhe Flogert Mzhika. Hetimet tregojnë se shpërthimi ka qenë kulmi i një serie shantazhesh dhe kërcënimesh të drejtuara ndaj pronarit të lokalit, Saimir Sina.

Sipas burimeve hetimore, disa ditë para vendosjes së lëndës eksplozive, Florin Domi — i cili zotëron një biznes në afërsi të lokalit — ka kontaktuar Sinën, duke i thënë se e kërkonte Jeton Lami. Kur Sina është takuar me Lamin, ky i fundit e ka akuzuar se “i kishte kundërshtuar”, ndonëse pronari ka deklaruar se nuk i njihte fare.

Në këtë moment, Lami i ka kërkuar 500 mijë euro, duke e kërcënuar se në të kundërt “do ta shikonte se çfarë do pësonte”. Sina ka refuzuar prerë. Pak ditë më pas, ai është larguar drejt Italisë, ku jeton prej vitesh.

Ndërkohë, Flogert Mzhika ka vijuar presionin ndaj dy kunetërve që administrojnë lokalin me qira, duke u thënë se “nuk do ta gëzonin dot biznesin”.

Sipas hetimeve, autori i vendosjes së tritolit dyshohet të jetë një anëtar tjetër i grupit, ende i paidentifikuar. Burime pranë grupit hetimor bëjnë me dije se ai mund të jetë i njëjti person i përfshirë në shpërthimin e lëndës eksplozive në banesën e Xhelal Mziut, si edhe në disa raste të tjera të ngjashme në zonë.

Hetimet vazhdojnë ndërsa policia po punon për identifikimin dhe kapjen e autorit të shpërthimit, i cili konsiderohet një element me rrezikshmëri të lartë.