Autoritetet italiane, në bashkëpunim me Prokurorinë e Posaçme SPAK në Shqipëri, kanë goditur një rrjet kriminal të strukturuar që operonte mes Durrësit dhe rajonit italian të Puglias, i përfshirë në trafik ndërkombëtar të kokainës dhe heroinës. Zbardhja e komunikimeve të koduara në aplikacionin Sky ECC, së bashku me dëshmitë e tre të penduarve të drejtësisë, çuan në identifikimin dhe arrestimin e anëtarëve kyç të këtij grupi.
Vëllezërit nga Elbasani dhe lidhja me Orges Molla
Një prej episodeve të rëndësishme në dosjen voluminoze të SPAK lidhet me arrestimin e dy vëllezërve nga Elbasani, Marjo dhe Gasper Ndini, të cilët u kapën në 18 shkurt 2021 nga policia italiane në Bergamo, në flagrancë teksa transportonin drogë.
Nga hetimet ka rezultuar se dy vëllezërit furnizoheshin me lëndë narkotike nga Orges Molla, i konsideruar pjesë e strukturës kriminale, dhe nga një tjetër person ende i paidentifikuar, me pseudonimin “FXG13J” në Sky ECC.
Komunikimet e zbërthyera në Sky ECC
Në dosje pasqyrohen bisedat e Orges Mollës me personin me pseudonim “FXG13J”, menjëherë pas arrestimit të vëllezërve:
H11QJ2 (Orges Molla): o shpirot mjes
FXG13J: Tu mush teli
H11QJ2: he me lal ca u bo… po lal hajde pim kafe ke shpia ime poshtë… përballë tatimeve jam
FXG13J: ja se po vi… i kanë kap
H11QJ2: mosss
FXG13J: ja dalin gazetat sot
H11QJ2: pfff
FXG13J: Dy vëllezër dhe pakot
Dy ditë më pas, më 20 shkurt, FXG13J i dërgon Mollës një fotografi nga media italiane, ku raportohej për arrestimin dhe sekuestrimin e drogës. Reagimi i Mollës ishte i ashpër:
H11QJ2: Vdekshin ishalla motërq*mat
Vijojnë hetimet për identifikimin e personit “FXG13J”
Autoritetet vijojnë hetimet për identifikimin e plotë të personit me pseudonim FXG13J, ndërsa grupi në fjalë dyshohet se kishte ndërtuar një rrjet të sofistikuar logjistik dhe shpërndarjeje mes Shqipërisë dhe Italisë, duke përdorur lidhje familjare dhe bashkëpunëtorë të besuar për të shmangur ndjekjen penale.
Operacioni “Ura” konsiderohet një nga goditjet më të forta të autoriteteve shqiptare dhe italiane ndaj trafikut të drogës në rajon, me dhjetëra të arrestuar dhe një sërë provash të siguruara nga komunikimet e enkriptuara në Sky ECC.
