Detaje të reja kanë dalë nga ngjarja makabre që ndodhi në Tiranë, ku profesori amerikan Mathew James Werts ka vrarë gruan e tij, dy qentë dhe më pas ka kryer vetëvrasje. Çifti kishte jetuar prej rreth 10 vjetësh në Tiranë dhe kishin marrë një shtëpi me qira. Ata nuk kishin fëmijë.

Profesori amerikan Mathew James Werts ishte martuar me Saragih Indah Lilis Sartika, shtetase indoneziane. Gjatë gjithë kohës që kanë jetuar në Tiranë, profesori kishte kontroll të plotë mbi gruan e tij, duke i ndaluar asaj të punonte ose të dilte nga shtëpia.

Ngjarja tragjike ka nisur kur Mathew James Werts ka filluar krimin duke mbytur gruan e tij, Saragih Indah Lilis Sartika, me një litar. Pas kësaj, ai ka dhunuar dy qentë e tyre deri në ngordhje, duke përdorur një shkop bejsbolli. Më pas, profesori ka kryer vetëvrasje.

Në një letër që ka lënë pas, profesori ka kërkuar falje nga prindërit e tij, duke u shpjeguar se nuk kishte arritur të bëhej një burrë i denjë dhe kishte vazhduar të kishte veset e tij. Ai ka përmendur emrat e disa personave që i kishte borxh dhe ka thënë se lekët që kishte lënë në kartë ishin të mjaftueshme për të shlyer borxhet e tij.