Raundi i dytë i zgjedhjeve presidenciale në Moldavi është shënuar nga tensione dhe frikë për ndërhyrje të huaja në një vend të vogël, por me rëndësi të madhe gjeostrategjike. Kërcënimet e shumta të sigurisë, nga fushatat e dezinformimit deri te përpjekjet për blerjen e votave, kanë krijuar një klimë pasigurie në të gjithë vendin. Vëzhguesit ndërkombëtarë kanë paralajmëruar për përpjekjet e mundshme të Rusisë për të destabilizuar procesin demokratik, duke u përqendruar tek këto zgjedhje si një tjetër front ku ndikimi rus synon të ushtrohet.
Agjencitë e sigurisë në Evropë dhe Amerikën e Veriut kanë evidentuar ndërhyrje ruse për të manipuluar zgjedhjet në vende si Italia, Franca, Gjermania, Spanja, Kanadaja, Rumania, SHBA dhe Mbretëria e Bashkuar. Ndërhyrjet përfshijnë edhe kërcënime me bomba në qendrat e votimit. Diaspora moldave, e cila përbëhet kryesisht nga shtetas pro-evropianë, mbështet fuqishëm kandidaten pro-perëndimore Maia Sanda. Nga ana tjetër, autoritetet në Kishinau kanë zbuluar përpjekje për blerje masive votash, dhe një burim i besueshëm ka deklaruar për Reuters se Rusia ka organizuar transportimin e qytetarëve moldavë nga Rusia drejt qendrave të votimit, në përpjekje për të rritur shanset e kandidatit pro-rus, Aleksandr Stoianoglu.
Përtej ndërhyrjeve të jashtme, fushata zgjedhore është karakterizuar edhe nga përplasje të ashpra mes dy kandidatëve, të cilët kanë qëndrime diametralisht të kundërta. Maia Sanda ka etiketuar kundërshtarin e saj si një “kalë trojan” të Moskës, ndërsa Stoianoglo e ka akuzuar Sandën për paaftësi dhe keqmenaxhim të ekonomisë, duke pretenduar se politikat e saj po çojnë vendin në ndarje të thella.
Një referendum i zhvilluar dy javë më parë për anëtarësimin e Moldavisë në Bashkimin Evropian ka nxjerrë në pah përçarjet e thella të vendit. Moldavët vendosën për anëtarësimin në BE, por rezultati i ngushtë tregon për ndarjen mes qytetarëve, pasi gati 50 për qind e votuesve u shprehën kundër. Shumë moldavë kanë frikë se anëtarësimi në BE do të kërcënojë fermerët e vegjël dhe interesat e tyre ekonomike, pasi qeveria në Kishinau nuk ka arritur të adresojë në mënyrë të plotë shqetësimet e qytetarëve të zakonshëm.
