Një zjarr i madh ka përfshirë mbrëmjen e sotme një banesë në lagjen nr. 4 të qytetit të Pogradecit. Sipas burimeve, zjarri dyshohet të ketë rënë aksidentalisht në banesën e shtetasit A.B., 80 vjeç, dhe më pas është përhapur në disa banesa ngjitur.

Shërbimet e zjarrfikësve dhe policia kanë ndërhyrë menjëherë në vendngjarje, duke evakuuar të gjithë banorët për të shmangur rrezikun për jetën e tyre. Fatmirësisht, familjarët kanë arritur të dalin nga shtëpitë e tyre në kohë, duke shmangur kështu viktima apo të lënduar.

Aktualisht, ekipet zjarrfikëse po punojnë intensivisht për të izoluar dhe shuar flakët, ndërsa grupi hetimor, nën drejtimin e Prokurorisë, po punon për përcaktimin e saktë të shkaqeve të rënies së zjarrit. Deri tani, raportohen vetëm dëme materiale të konsiderueshme.

Autoritetet u bëjnë thirrje qytetarëve që të shmangin zonën përreth dhe të tregojnë kujdes të shtuar në raste të tilla emergjencash.