Një zjarr i fuqishëm shpërtheu në ambientet e brendshme të një pallati 8 katësh në lagjen nr. 4 të qytetit të Korçës, duke shkaktuar panik tek banorët. Sipas dëshmive të tyre, të gjithë katet e larta të pallatit ishin mbuluar nga tymi që vinte nga kati i dytë, në një ambient të përbashkët. Për shkak të rrezikut nga asfiksimi, banorët u detyruan të evakuoheshin menjëherë.

Sipas shërbimit zjarrfikës, zjarrëvënia ka ndodhur në një ambient të përbashkët në katin e dytë, ku kalojnë tubacionet e rëndësishme të pallatit, përfshirë ato të energjisë elektrike dhe të ujit të pijshëm. Zjarri ka përfshirë disa objekte të braktisura nga banorët dhe ka shkaktuar shpërthimin e tubave të ujit të pijshëm, çka ka sjellë probleme të tjera për banorët.

Reagimi i menjëhershëm i shërbimit zjarrfikës dhe punonjësve të OSSHE-s bëri të mundur izolimin e flakëve dhe shkëputjen e energjisë elektrike për të parandaluar përhapjen e mëtejshme të zjarrit dhe rrezikun për banorët.

Banorët kanë përshkruar momentet e panikut kur pallati ishte mbuluar nga tymi, duke krijuar vështirësi të mëdha për ta dhe fëmijët e tyre. Fatmirësisht, nuk raportohet për persona të lënduar, por situata ka qenë jashtëzakonisht alarmante.