Është riaktivizuar mëngjesin e sotëm vatra e zjarrit në malin e Shën Gjergjit, në fshatin Dukat, duke vënë në lëvizje autoritetet vendore. Forcat zjarrfikëse dhe strukturat e emergjencave civile janë njoftuar menjëherë dhe kanë mbërritur në vendngjarje për të përballuar situatën dhe për të lokalizuar flakët.

Aktualisht nuk raportohen rrezik për banesat apo jetën e qytetarëve, por terreni i thyer dhe kushtet atmosferike mund të vështirësojnë ndërhyrjen. Autoritetet po monitorojnë nga afër zhvillimet për të parandaluar përhapjen e mëtejshme të zjarrit.

Ky është rasti i dytë brenda pak ditësh që vatra në këtë zonë riaktivizohet, çka ngre shqetësimin për rrezikun që përfaqëson kjo zonë malore ndaj flakëve, sidomos në ditët me temperatura të larta. Autoritetet apelojnë për kujdes dhe bashkëpunim nga ana e qytetarëve për të shmangur zjarrvëniet e qëllimshme apo të pakujdesshme.