Hetimet mbi kompaninë Soft & Solution të Ermal Beqirit, i cili ndodhet në kërkim nga SPAK për disa vepra penale, kanë zbuluar se kompania po punonte në zhvillimin e sistemeve të brendshme të Policisë së Shtetit.
Sipas informacioneve nga Byroja Kombëtare e Hetimit, më 19 qershor 2025 rreth orës 14:00, u krye një këqyrje e ambienteve të punës së kompanisë. Zyrat e shoqërisë ndodheshin në katin e dytë të një pallati dhe dera ishte e hapur, por punonjësit nuk po punonin për shkak të mungesës së energjisë elektrike.
Të gjithë të pranishmit, të rinj të rekrutuar nga zyra e burimeve njerëzore e Soft & Solution, deklaruan se punonin në zyrën e programimit të shoqërisë prej rreth një viti dhe po zhvillonin sistemin e çështjeve të Policisë së Shtetit. Hetimi është pjesë e një vlerësimi më të gjerë të veprimtarisë së kompanisë, ndërsa SPAK vijon procedurat për zbardhjen e plotë të situatës.
