15-vjeçari Aurel Bibaj, i cili kishte humbur kontaktet me familjen e tij për dy ditë, është gjetur i sigurt nga policia e Shkodrës në bashkëpunim me komisariatin nr. 5 në Tiranë dhe ndihmën e familjarëve. Ai është gjetur në zonën e Babrrusë, në Tiranë, dhe ndodhet në gjendje të mirë shëndetësore.

Aurel, nga Postriba, ishte larguar mëngjesin e djeshëm pasi kishte lënë vëllain në shkollë, por nuk kishte shkuar në mësim dhe nuk ishte kthyer në shtëpi. Ky veprim ka shqetësuar prindërit, ndërsa babai i tij, Agim Bibaj, ka denoncuar rastin në polici dhe më pas në media, duke thënë se sipas dëshmisë së shokëve të tij, djali ishte larguar pas një konflikti me të atin, i cili i kishte bërë vërejtje për sjelljen e tij.

Pas një angazhimi të madh nga policia, Aurel është gjetur dhe i është dorëzuar familjes. Ai do të merret në pyetje nga autoritetet në praninë e psikologëve, për të zbardhur arsyet e largimit të tij dhe për të siguruar mbështetje psikologjike.