Një 25-vjeçar shqiptar është dënuar me burg nga Gjykata e Solingenit në Gjermani, pasi u shpall fajtor për përfshirje në trafikun e 120 kilogramëve kokainë. Sipas hetimeve, i riu kishte përfituar rreth 2.6 milionë euro nga ky aktivitet kriminal.

Ai ishte shpallur më parë në kërkim ndërkombëtar dhe u arrestua në Kroaci, teksa tentonte të kalonte kufirin. Pas disa muajsh në paraburgim atje, ai u transferua në burgun e Wuppertalit në Gjermani në mars të këtij viti.

Gjatë seancës gjyqësore, i riu pranoi fajësinë dhe deklaroi se lëndën narkotike ia kishte shitur një tjetër shtetasi shqiptar që jetonte në Solingen. Hetimet zbuluan se ai përdorte një llogari në aplikacionin “Signal” me pseudonimin “Pokémon” për të komunikuar me pjesëtarët e rrjetit të drogës.

Prokuroria gjermane ka rënë dakord që pas kryerjes së gjysmës së dënimit, i dënuari të ekstradohet në Shqipëri. Vendimi përfundimtar pritet të shpallet më 31 tetor 2025.