Nga një i dënuar me burgim të përjetshëm për vrasje, në një objektiv për eliminim brenda burgut. Kjo është situata e Ruben Saraiva, për të cilin, sipas burimeve operative, është vendosur një shpërblim prej 500 mijë eurosh për ta vrarë.

31-vjeçari portugez u dënua me burgim të përjetshëm nga gjyqtari Lirim Bulica në Gjykata e Lezhës, për vrasjen në bashkëpunim të Ardian Nikulaj.

Frika nga “bashkëpunimi me drejtësinë”

Sipas informacioneve, eliminimi i tij dyshohet të kërkohet nga persona të përfshirë në skemë, për shkak të frikës se Saraiva mund të bashkëpunojë me drejtësinë shqiptare dhe të zbulojë rekrutuesit dhe financuesit e krimit në Britani.

Ky informacion është konsideruar serioz nga autoritetet, duke bërë që Saraiva të vendoset në regjim të rreptë izolimi në paraburgimin 302 Mine Peza, larg të burgosurve të tjerë.

Masa të forta sigurie

Siguria ndaj tij është rritur ndjeshëm edhe gjatë paraqitjes në gjykatë. Ai u shoqërua nga forca të armatosura të Operacionales së Burgjeve, ndërsa perimetri i gjykatës u blindua nga dhjetëra efektivë të policisë kriminale dhe Forcave “Shqiponja”.

Brenda sallës së gjyqit, Saraiva qëndroi nën mbikëqyrje të rreptë në “kafazin” e sigurisë, përballë familjarëve të viktimës, përfshirë bashkëshorten e Ardian Nikulaj.

Reagimi i Portugalisë

Ndërkohë, Ministria e Punëve të Jashtme e Portugalisë ka konfirmuar se po ndjek nga afër çështjen. Autoritetet portugeze theksojnë se aktualisht nuk ekziston asnjë marrëveshje ekstradimi apo transferimi të të dënuarve mes Portugalisë dhe Shqipërisë, por shtojnë se do të shqyrtohen të gjitha mundësitë ligjore.

Rasti i Saraivës mbetet një nga më të ndjeshmit, jo vetëm për krimin e rëndë për të cilin është dënuar, por edhe për rreziqet që lidhen me sigurinë e tij dhe implikimet e mundshme që mund të ketë për hetimet e mëtejshme.