Ministrja e Ekonomisë e Kosovës, Artane Rizvanolli, njoftoi të shtunën se, pavarësisht sulmit ndaj kanalit të ujit të Ibër-Lepencit, furnizimi i rregullt me energji elektrike dhe ngrohje qendrore për qytetarët e Prishtinës është garantuar.

Shpërthimi, i ndodhur të premten mbrëma në fshatin Varragë të komunës së Zubin Potokut, shkaktoi dëme të mëdha në kanalin e ujit, i cili është jetik për furnizimin e disa qyteteve dhe për ftohjen e termoelektranave të Korporatës Energjetike të Kosovës (KEK).

“Ibër-Lepenci, rreth orës 02:00 pas mesnate, ka vendosur gjashtë tuba të përkohshme me kapacitet të mjaftueshëm për të siguruar ujë për ftohjen e termocentralit ‘Kosova B’, duke garantuar vazhdimësinë e furnizimit me energji elektrike,” tha ministrja Rizvanolli në një postim në Facebook.

Në një mbledhje të jashtëzakonshme të Këshillit të Sigurisë, u vendos gjithashtu bashkëpunimi me Korporatën Energjetike të Shqipërisë për të siguruar energji shtesë, në rast të nevojës për të shmangur ndërprerjet.

Pasojat e sulmit dhe akuzat
Përveç ndikimit në furnizimin me energji, shpërthimi ka ndikuar edhe furnizimin me ujë. Rizvanolli informoi se në Prishtinë furnizimi do të kompensohet nga Badovci dhe Batllava, ndërsa në Fushë Kosovë, Drenas dhe Mitrovicë do të përdoren autobotë për shpërndarjen e ujit.

Kryeministri i Kosovës, Albin Kurti, e cilësoi këtë sulm si një “akt kriminal dhe terrorist”, duke akuzuar Serbinë për qëllimin e dëmtimit të infrastrukturës më të rëndësishme të vendit. Sulmi u dënua gjithashtu nga përfaqësues ndërkombëtarë në Kosovë.

Ky ishte sulmi i tretë brenda 72 orëve në veri të vendit, pas shpërthimeve në një stacion policor dhe ndërtesën e Komunës në Zveçan. Policia e Kosovës ka shtuar masat e sigurisë, veçanërisht në veriun e vendit, ku tensionet dhe aktet kriminale janë intensifikuar ditët e fundit.