Presidenti i Shteteve të Bashkuara, Donald Trump, ka firmosur një urdhër ekzekutiv për riemërtimin e Liqenit Ontario në “Liqeni Amerika”, në një tjetër përplasje simbolike me Kanadanë, teksa tensionet tregtare mes dy vendeve janë përshkallëzuar.

“Ne do ta ndryshojmë emrin e Liqenit Ontario, menjëherë, në Liqeni Amerika”, deklaroi Trump në Zyrën Ovale pak para firmosjes së urdhrit.

Vendimi i Trump kërkon që autoritetet federale amerikane të përdorin emërtimin “Lake America” në dokumentet dhe referencat zyrtare të SHBA-së. Megjithatë, urdhri nuk mund ta detyrojë Kanadanë apo organizmat ndërkombëtarë ta përdorin këtë emër.

Liqeni Ontario është një prej pesë Liqeneve të Mëdha të Amerikës së Veriut dhe shtrihet në kufirin mes SHBA-së dhe Kanadasë.

Riemërtimi vjen në një periudhë tensionesh të forta mes Uashingtonit dhe Otavës, pas përshkallëzimit të luftës tregtare dhe vendosjes së tarifave të reja. Trump e ka justifikuar vendimin me pretendimet e tij se Kanadaja nuk ka tregtuar në mënyrë të drejtë me Shtetet e Bashkuara.

Ky nuk është rasti i parë që administrata Trump ndërhyn në emërtimin e një prej objekteve të njohura gjeografike. Në vitin 2025, presidenti urdhëroi që në përdorimin federal amerikan Gjiri i Meksikës të quhej “Gjiri i Amerikës”.

Ndërkohë, në Kanada emri historik “Liqeni Ontario” vijon të konsiderohet emërtimi zyrtar dhe autoritetet kanadeze kanë kundërshtuar ndryshimin e njëanshëm të emrit.