Një ngjarje e rëndë është shënuar mbrëmjen e së enjtes në zonën e “Urës së Vashës” në Klos, ku një 35-vjeçar ka humbur jetën pasi dyshohet se është hedhur nga ura.

Sipas informacioneve paraprake, 35-vjeçari, banues në fshatin Bastar Murrize të Tiranës, kishte udhëtuar me automjetin e tij dhe e kishte ndaluar pranë urës, e cila ka një lartësi prej rreth 152 metrash.

Dyshohet se i riu po përballej me probleme të rënda emocionale. Pak para se të ndërmerrte aktin fatal, ai i ka dërguar një mesazh familjes, duke i lënë bashkëshortes një amanet për vajzën e tyre.

Policia ka nisur hetimet për të dokumentuar rrethanat e plota të ngjarjes dhe për të hedhur dritë mbi shkaqet që çuan 35-vjeçarin drejt këtij akti tragjik.