Sot zhvillohet protesta e 90-të kundër kryeministrit Edi Rama dhe qeverisë së tij. Qytetarët pritet të mblidhen para Kryeministrisë, aty ku prej tre muajsh kanë protestuar duke kërkuar dorëheqjen e qeverisë dhe hapjen e rrugës për krijimin e një qeverie tranzitore.

Protestuesit pritet të zhvendosen gjithashtu para selisë së Partisë Socialiste, ku në orën 17:30 është parashikuar një mbledhje e ministrave dhe drejtuesve të qarqeve me kryeministrin Edi Rama.

Në protestën e një dite më parë, aktivistja Arvina Lleshi u bëri thirrje qytetarëve që të mblidhen përpara selisë së PS-së.

“Të marrin vezë me vete dhe të shkojmë t’u bëjmë përshëndetjen e radhës, duke iu thënë: ‘Nuk na përfaqësoni, nuk na përfaqësoni, nuk na përfaqësoni’. Mos harroni, nesër te selia e PS-së”, tha Lleshi.

Në protestën e zhvilluar dje para Kryeministrisë, qytetarët përsëritën kërkesat e tyre ndaj qeverisë, duke kërkuar dorëheqjen e saj dhe krijimin e një qeverie tranzitore.

Mes kërkesave të protestuesve është edhe arrestimi i kryeministrit Edi Rama, Sali Berishës dhe Belinda Ballukut. Protesta e sotme pritet të zhvillohet në të njëjtën linjë, ndërsa organizatorët kanë bërë thirrje për pjesëmarrje të qytetarëve.