Detaje të reja dalin në dritë në lidhje me vrasjen e Shkëlzen Velajt në Vlorë, i cili u qëllua me breshëri kallashnikovi në derën e banesës së tij.

Policia e ka shtrirë hetimin në dy pista, atë të hasmërisë së vjetër për shkak të vrasjes së vëllait të tij në Masakrën e Çoles më 7 prill të 2015-ës si dhe atë të konflikteve për lëndë narkotike.

Mësohet se 42-vjeçari ishte i papunë, ndërsa jetonte i vetëm me nënën e tij në katin e pestë të një pallati të vjetër.

Shkëlzen Velaj ka qenë duke hyrë për në shtëpi, kur ka vënë re se pranë pallatit ka qenë duke u ndjekur nga një makinë e dyshimtë. Velaj e ka lënë makinën e tij ndezur dhe ka ikur me vrap për t’u futur në banesë, në katin e 5 të pallatit. Kur ka qenë duke hapur derën atentatori ka lëshuar breshëri plumbash në drejtim të tij.

Ndërkohë që në vendin e ngjarjes janë gjetur 30 gëzhoja.

Plumbat në drejtim të 42-vjeçarit kanë qenë nga një distancë e afërt. Po ashtu bëhet e ditur se në trupin e Velaj është lëshuar një karikator automatiku, që i kanë kushtuar jetën. Sipas policisë Velaj ka ndërruar jetën në spital, ndërkohë që atentati dyshohet të jetë kryer nga 2 apo më shumë persona.

Po ashtu bëhet e ditur se autorët pas atentatit janë larguar në drejtim të rrugës së lumit të Vlorës, në afërsi të fshatit Risili ku kanë braktisur makinën tip BMË pa targa dhe e kanë djegur, ndërsa janë larguar në drejtim të paditur. Policia, pasi mbërriti në vendin e ka bërë grumbullimin e materialeve dhe po punon për zbardhjen e rrethanave.