Një skaf me 8 persona në bord ka rrezikuar të fundosej në ujërat pranë Spillesë, pasi pësoi defekt në motor dhe u mbush me ujë.

Ngjarja ndodhi rreth 1 milje nga bregu, në drejtim të Forsilukut, ku Policia Kufitare dhe Njësia Policore Detare, gjatë monitorimit të hapësirës detare, konstatuan mjetin lundrues në vështirësi.

Në bord ndodheshin drejtuesi i skafit dhe 7 familjarë të tij. Për shkak të defektit në motor, mjeti kishte marrë ujë dhe rrezikonte të fundosej.

Shërbimet policore ndërhynë menjëherë pas konstatimit të situatës, duke u dhënë ndihmën e nevojshme personave në bord dhe duke tërhequr skafin drejt bregut.

Mjeti lundrues u nxor në breg në zonën e Karpenit.

Të gjithë personat rezultuan në gjendje të mirë shëndetësore dhe falënderuan efektivët për ndërhyrjen dhe ndihmën e dhënë.

Nga verifikimet e kryera pas incidentit rezultoi se skafi kishte dokumentacion të rregullt, ndërsa drejtuesi dispononte leje drejtimi për mjetin lundrues.