Kryetari i Partisë Demokratike, Prof. Dr. Sali Berisha, ka komentuar zhvillimet më të fundit politike në vend gjatë bashkëbisedimit të përjavshëm me qytetarët në rrjetet sociale.

Berisha u ndal te procesi i ripërtëritjes dhe modernizimit të Partisë Demokratike, protestat qytetare, arrestimi i Ergys Agasit, situata ekonomike, reforma territoriale, marrëdhëniet me Kosovën, si dhe zhvillimet brenda mazhorancës dhe veprimtaria e SPAK-ut.

Kryedemokrati e cilësoi javën e kaluar si një moment të rëndësishëm për PD-në, pas mbledhjes së Këshillit Kombëtar të partisë. Sipas tij, në qendër të procesit të ripërtëritjes duhet të jetë anëtari i PD-së, iniciativa dhe hapësira për të kontribuar, me synimin që partia të shndërrohet në një forcë më të organizuar dhe konkurruese përballë mazhorancës.

Berisha për ekonominë: Rritja nuk është ndjerë te qytetarët

Berisha u ndal edhe te situata ekonomike, duke iu referuar të dhënave që ai ia atribuoi Eurostat-it.

Kryetari i PD-së deklaroi se prodhimi industrial në Shqipëri ka pësuar rënie të ndjeshme dhe kritikoi rritjen e sektorit të ndërtimit. Sipas tij, kjo rritje ekonomike nuk është reflektuar në mënyrë të barabartë te qytetarët.

Berisha përmendi çmimet e larta, papunësinë, emigracionin dhe dobësimin e shërbimeve publike si disa prej pasojave që, sipas tij, kanë ardhur nga politikat e qeverisë.

Përplasja Rama-Veliaj, Berisha: “Viktimë janë qytetarët e Tiranës”

I pyetur nga një qytetar për zhvillimet në Bashkinë e Tiranës dhe shkarkimin e kryetares së komanduar, Anuela Ristani, Berisha foli për një përplasje në rritje mes Erion Veliajt dhe kryeministrit Edi Rama.

Sipas liderit demokrat, zhvillimet e fundit janë shenjë e dobësimit të kryeministrit dhe konflikti mes Ramës dhe Veliajt mund të krijojë hapësirë për opozitën.

Berisha deklaroi se viktimë e kësaj përplasjeje janë qytetarët e Tiranës, ndërsa kritikoi gjendjen e kryeqytetit, duke u ndalur veçanërisht te ndotja në lumin e Tiranës.

Reforma territoriale, PD kërkon 100 bashki

Një tjetër çështje e ngritur gjatë bashkëbisedimit ishte reforma territoriale dhe pjesëmarrja e PD-së në zgjedhjet vendore nëse mazhoranca vendos ta miratojë në mënyrë të njëanshme.

Berisha deklaroi se opozita do të ndjekë të gjitha rrugët për të mbrojtur qëndrimet e saj.

Ai bëri të ditur se PD synon një hartë me 100 bashki, ndërsa shtoi se mund të propozojë edhe krijimin e bashkive të tjera, në varësi të konsultimeve me komunitetet.

Sipas Berishës, reforma territoriale ka ndikuar edhe në procesin e shpopullimit të vendit.

Kryetari i PD-së vijoi bashkëbisedimin duke iu përgjigjur edhe pyetjeve të tjera të qytetarëve mbi zhvillimet politike, mazhorancën dhe aktivitetin e SPAK-ut.