Ish-kandidati i Partisë Demokratike për deputet, Arben Tafaj, ka ndërruar jetë tragjikisht rreth orës 00:40 të datës 3 dhjetor 2024, në Rrugën e Dajtit, pasi ka rënë aksidentalisht nga një lartësi prej 10 metrash. Tafaj, 63 vjeç, dyshohet të ketë qenë në gjendje të dehur kur ndodhi aksidenti, dhe për shkak të plagëve të rënda, nuk ia doli të mbijetonte. Ai u dërgua menjëherë në urgjencën e spitalit të Traumës, por mjekët nuk mundën ta shpëtonin.

Pas ndarjes nga jeta të Arben Tafajt, mjeku dhe aktivisti Ilir Alimehmeti reagoi në rrjetet sociale, duke e kujtuar Tafajn si një qytetar elitar, një aktivist të pasionuar dhe një politikan me tone të moderuara qytetare. Alimehmeti shkroi se humbja e Arben Tafajt ishte një goditje e madhe për qytetin e Tiranës dhe për ata që e njihnin, duke e cilësuar atë si një njeri të urtë dhe të matur.

Arben Tafaj ka qenë një figurë e njohur në Tiranë. I diplomuar në Fakultetin Ekonomik të Universitetit të Tiranës, ai kishte kryer gjithashtu një master shkencor për menaxhimin e pushtetit vendor. Në periudhën 2003-2015, ai ka qenë kryetar i minibashkisë nr.8 në Tiranë, një post që e mbajti për tre mandate. Pas kësaj periudhe, ai ka shërbyer si nënkryetar i PAA-së dhe kryetar i shoqatës “Tirana”. Tafaj gjithashtu ka qenë autor i artikujve të ndryshëm dhe bashkëautor në vëllimet e Serisë Biografike të figurave të njohura të Tiranës.