Ministrja e Shëndetësisë dhe Mbrojtjes Sociale, Albana Koçiu, ka bërë të ditur se buxheti i Ministrisë për vitin 2025 do të jetë 103 miliardë lekë, që kalon vlerën 1 miliard euro, duke zënë 12,57% të buxhetit të shtetit dhe 3,94% të Prodhimit të Brendshëm Bruto (PBB).

Në fjalën e saj në Kuvend, ku po diskutohej nen për nen buxheti i vitit 2025, Koçiu theksoi se “rritja e buxhetit vit pas viti është një angazhim i vazhdueshëm” dhe se ky fakt është i pasqyruar edhe në buxhetin e 2025 me një rritje prej 5% krahasuar me vitin 2024.

Ministrja njoftoi gjithashtu se 3,9 miliardë lekë janë shtesë për shëndetësinë në këtë buxhet, duke fokusuar investimet në rehabilitimin e 107 qendrave shëndetësore dhe hapjen e mbi 10 kantiereve të reja spitalore. Ajo përmendi disa projekte të mëdha infrastrukturore, si rikonstruksionin e QSUNT, maternitetin e spitalit të Fierit, shërbimin e patologjisë në Vlorë, dhe spitale të tjera në Pogradec, Shkodër, Berat, Lushnjë, dhe Korçë.

Koçiu nënvizoi gjithashtu shtesën prej 3,2 miliardë lekë për shpenzime korrente, që përfshijnë rritjen e pagave për mjekët dhe infermierët në korrik të vitit 2024, e cila ka rezultuar në një rritje të pagave për disa kategori profesionesh deri në 120% në 5 vitet e fundit, me qëllimin për të rikthyer dinjitetin e punonjësve të shëndetësisë dhe për të garantuar një transformim të thellë të sektorit.