Kreu i grupit të PD, Gazment Bardhi, ka kërkuar zhvillimin e një interpelance me Kryeministrin Edi Rama, në lidhje me pagesën prej 110 milionë euro të shtetit shqiptar për biznesmenin italian Francesco Becchetti. Bardhi theksoi se ky është një çështje e rëndësishme, pasi ka pasur një zotim publik nga Kryeministri se Beccheti nuk do të merrte asnjë pagesë nga buxheti i shtetit, ndërsa faktet tregojnë se ky biznesmen ka marrë një shumë më të madhe se sa ajo që ishte planifikuar për bonusin e pensionistëve.

Gazment Bardhi: Thërrisni kryeministrin dhe të realizojmë interpelancën si një e drejtë që na e njeh kushtetuta. Çështja është madhore, ka patur zotim publik të kryeministrit që ky biznesmen nuk do marrë asnjë lek nga buxheti i shtetit. E vërteta është se ai ka marrë më shumë se fondi që keni planifikuar për bonusin e pensionistëve. Do mjaftonte ajo shumë që të parashikonim të njëjtin bonus për vitin 2025.
Elisa Spiropali: Kërkesa juaj është marrë nga kryetarja e Kuvendit, kryeministrit për shkak të axhendës nuk mund të zhvillohet sot, por do zhvillohet sipas procedurës për në seancën e radhës apo të parën.