Opinionin publik e tronditi një ngjarje e rëndë që ndodhi në një familje shqiptare me banim në Athinë, Greqi. Kastriot Cenko, një 39-vjeçar shqiptar, njoftoi policinë greke pasditen e sotme dhe rrëfeu se kishte vrarë bashkëshorten e tij duke e goditur me çekiç. Sipas dëshmisë së tij, motivi i këtij akti makabër ishte xhelozia.

Ngjarja kishte ndodhur një javë më parë, më 28 nëntor, por Kastrioti kishte mbajtur trupin e pajetë të bashkëshortes në papafingon e banesës për shtatë ditë, duke e mbuluar me qese plastike. Gjatë gjithë kësaj kohe, në të njëjtën shtëpi jetonin edhe dy djemtë e mitur të çiftit, vetëm 9 dhe 12 vjeç. Babai u kishte thënë fëmijëve se nëna e tyre kishte shkuar për vizitë tek të afërmit.

E megjithatë, aroma e rëndë që përhapej në shtëpi dhe më pas në lagje e detyroi Kastriotin të rrëfente të vërtetën e tmerrshme. Ai njoftoi policinë dhe pranoi krimin që kishte kryer.

Sipas dëshmisë së tij, gjithçka ndodhi pas një telefonate që bashkëshortja mori nga një mik. Ajo hyri në banjë për të folur në telefon, gjë që nxiti dyshimet dhe xhelozinë e Kastriotit. Ai e goditi me çekiç në kokë, duke e lënë pa ndjenja, dhe më pas e mbyti me duar. Trupin e saj e mbështolli me çarçaf dhe e fshehu në dhomën e tyre.

Në postimet e tij në Facebook, Kastrioti shpesh shfaqte momente të lumtura familjare, duke lënë përshtypjen e një martese të mbushur me dashuri. Megjithatë, pas fasadës së një jete të lumtur, qëndronte një marrëdhënie e përshkuar nga tensionet dhe xhelozia.

Kastrioti justifikoi aktin e tij duke thënë: “Më tradhtonte me shokun tim, prandaj e vrava”.

Ngjarja ka tronditur jo vetëm komunitetin shqiptar në Greqi, por edhe opinionin publik më gjerë, duke ngritur pyetje të shumta mbi dhunën brenda familjes dhe efektet e saj tragjike. Ndaj Kastriot Cenko është ngritur akuza për vrasje, ndërsa dy fëmijët e mitur po trajtohen nga autoritetet sociale.