Policia e Tiranës ka sekuestruar 10,640 kilogramë qymyr për shisha, i cili dyshohet të jetë kontrabanduar në Shqipëri. Sasia e konsiderueshme e qymyrit u gjet gjatë një operacioni të mirëorganizuar në dy subjekte në kryeqytet. Në kuadër të këtij aksioni, janë shpallur në kërkim dy administratorë të dyshuar të këtyre subjekteve, shtetasit I. I., 39 vjeç, dhe Y. I., 45 vjeç.

Përveç qymyrit për shisha, policia ka sekuestruar gjithashtu mallra të tjerë, përfshirë artikuj veshjesh, ekspozitorë metalikë për butiqe, sisteme sigurie dhe aksesorë të ndryshëm.

Policia njoftoi se hetimet për rastin janë në vazhdim, ndërkohë që materialet e mbledhura janë referuar në Prokurorinë për ndjekje të mëtejshme ligjore.

Në deklaratën e saj, Policia e Tiranës sqaroi:
“Gjatë operacionit është ushtruar kontroll në subjektet me administratorë shtetasit I. I., 39 vjeç, dhe Y. I., 45 vjeç, ku janë gjetur dhe sekuestruar në cilësinë e provës materiale artikuj të ndryshëm, ekspozitorë metalikë për veshje, sisteme sigurie për butiqe, ekspozitorë aksesorësh të tjerë dhe veshje të ndryshme, si dhe 10,640 kg qymyr për shisha. Punohet për kapjen e shtetasve I. I. dhe Y. I.”

Shisha, e cila është kthyer në një trend të përhapur mes të rinjve jo vetëm në lokale por edhe në ambiente private, vijon të jetë një industri në rritje, shpesh e lidhur me tregtinë joformale dhe kontrabandën.

Operacioni, i cili u kodua “Hidden”, është pjesë e përpjekjeve të vazhdueshme të autoriteteve për të luftuar kontrabandën dhe tregtinë e paligjshme në vend.