Kryeministri Edi Rama, gjatë pjesëmarrjes në podkastin “Flasim”, diskutoi mbi temën e emigracionit dhe vështirësitë e jetesës jashtë vendit, veçanërisht në Itali. Ai theksoi se të rinjtë kanë të drejtën e tyre të largohen dhe të provojnë jetesën në shtete të tjera, por shtoi se ajo që i ngatërron shumë është perceptimi i pagave, pa marrë parasysh koston e jetesës.

Rama theksoi se gjëja që e bëri të paqartë për shumë emigrantë është se ata nuk bëjnë llogaritë e sakta, pasi shpesh vetëm e krahasojnë pagën bruto pa marrë parasysh shpenzimet e jetesës. “Me 1500 euro rrogë, në Itali duhet të ndash shtëpinë, sepse ndryshe nuk mund të marrësh një shtëpi tënde me qira,” tha ai, duke shpjeguar se jetesa atje është bërë shumë më e shtrenjtë.

Kryeministri pohoi se ndonëse të rinjtë kanë të drejtën të kërkojnë mundësi të reja jashtë, është e rëndësishme që ata të kuptojnë se sa do t’u ngelet realisht pas shpenzimeve për të jetuar dhe se mundësitë e jetesës në Itali janë shumë më të kufizuara se sa ato që shpesh mendojnë.