Policia e Tiranës ka arrestuar sot tre persona, të cilët dyshohet se shpërndanin lëndë narkotike, konkretisht kanabis, të ndarë në doza gati për shitje. Sipas njoftimit të Policisë, arrestimi i tyre ka ardhur pas operacionit të realizuar nga shërbimet e Komisariatit të Policisë Nr. 2 dhe Nr. 4, në bashkëpunim me Sektorin për Hetimin e Narkotikëve, bazuar në informacionet e siguruara përmes inteligjencës informative.

Të arrestuarit janë O. B., 23 vjeç, A. Gj., 24 vjeç dhe Y. G., 25 vjeç, të tre banues në Tiranë. Gjatë kontrollit fizik, policia ka sekuestruar sasi me lëndë të dyshuar narkotike kanabis, pjesërisht të ndarë në doza. Verifikimet e mëtejshme kanë treguar se ata shpërndanin lëndën narkotike në disa lagje të ndryshme të kryeqytetit.

Materialet e çështjes janë kaluar për hetime në Prokurorinë e Tiranës për veprimet e mëtejshme ligjore.