Presidenti i sapozgjedhur i SHBA, Donald Trump, ka bërë thirrje për një “armëpushim të menjëhershëm” në Ukrainë. Në një mesazh të postuar në platformën e tij në internet “Truth Social” të dielën, ai i bëri thirrje Kievit dhe Moskës që të fillojnë negociata pa humbur kohë. Trump gjithashtu deklaroi se presidenti ukrainas Volodymyr Zelensky është i gatshëm për një “marrëveshje” me Rusinë për të ndaluar luftën, duke theksuar se është e nevojshme të arrihet një zgjidhje pa vonesa.
Republikani, i cili do të marrë mandatin e tij të dytë në Shtëpinë e Bardhë më 20 janar, pati një takim të rëndësishëm me Zelenskyn një ditë më parë në Paris. Në këtë takim, që gjithashtu përfshiu presidentin francez Emmanuel Macron, Zelensky e vlerësoi bisedën si të dobishme dhe produktive. Në një deklaratë të mëvonshme, presidenti ukrainas bëri thirrje për një “paqe të drejtë” dhe kërkoi “garanci të forta sigurie” për Ukrainën. Kjo kërkesë erdhi pas takimit të tre liderëve në Paris, ku ata morën pjesë në rihapjen e katedrales Notre-Dame, e cila u restaurua pas dëmtimit nga djegia.
Në deklaratën e tij, Trump shtoi se Zelensky dhe Ukraina do të donin të bënin një marrëveshje dhe t’i jepnin fund “çmendurisë” që po ndodhte në Ukrainë, duke paralajmëruar gjithashtu për rrezikun e përshkallëzimit të luftës në një konflikt edhe më të madh dhe më të dëmshëm. Trump, që gjatë fushatës zgjedhore kishte premtuar se do t’i jepte fund luftës në Ukrainë “brenda 24 orëve”, ende nuk ka sqaruar se si do të arrinte këtë qëllim. Ai gjithashtu kritikoi ashpër ndihmën masive ushtarake amerikane për Ukrainën, duke e quajtur atë një rrezik për vazhdimin e luftës dhe për pasojat që mund të sjellë kjo për SHBA-në dhe botën.
Takimi i fundit mes Trump dhe Zelensky ishte një zhvillim i rëndësishëm diplomatik, ku ndodhi një shkëmbim i mendimeve dhe ideve për të ardhmen e Ukrainës dhe për mundësinë e arritjes së një marrëveshjeje paqësore. Ky takim u vlerësua si një sukses politik, ndonëse ekspertët e diplomacisë, si Jean de Gliniasty, ish-diplomat dhe drejtues i kërkimeve në Institutin Francez të Marrëdhënieve Ndërkombëtare dhe Strategjike IRIS, vlerësojnë se Franca nuk mund të veprojë si epiqendër e diplomacisë ndërkombëtare për të ndërmjetësuar në këtë konflikt. Ai tha se Trump ka marrë shumë hapësirë në këtë çështje dhe se Franca ka ende mundësinë të ndihmojë në një mënyrë të dytë, duke ndikur te Trump për të krijuar mundësinë e një marrëveshjeje.
Nga ana tjetër, Kancelari gjerman Olaf Scholz ka besim se mund të arrihet një strategji e përbashkët për Ukrainën me presidentin e sapozgjedhur amerikan Trump. Scholz deklaroi se ai ka pasur biseda të drejtpërdrejta me Trump dhe zyrtarët e tij të politikës së sigurisë dhe se është i bindur se mund të krijohet një qasje e përbashkët. Ai shtoi se asgjë nuk duhet të vendoset për Ukrainën pa përfshirë dëshirat dhe vullnetin e popullit ukrainas, duke e theksuar se nuk do të pranonte heqjen e territoreve ukrainase si kusht për armëpushim.
