Sergey Yevsyukov, 49 vjeç, ish-drejtor i burgut Olenivka në rajonin lindor të Donetskut, është vrarë sot nga një shpërthim bombe në makinën e tij, Toyota Land Cruiser. Ngjarja ndodhi në qytetin Donetsk, ku automjeti i Yevsyukov shpërtheu, duke shkaktuar vdekjen e tij dhe plagosjen e rëndë të bashkëshortes, e cila është dërguar në spital për trajtim.

Sipas raportimeve, shpërthimi është shkaktuar nga një eksploziv i vendosur në sediljen e shoferit. Dëshmitarë okularë ndihmuan çiftin të dilnin nga makina e shkatërruar, por për Yevsyukov ishte tepër vonë.

Yevsyukov ishte një figurë shumë e kritikuar dhe i akuzuar për krime lufte dhe tortura. Si drejtor i burgut Olenivka, ai mbahej përgjegjës për keqtrajtimin e të burgosurve ukrainas, përfshirë ata që mbijetuan rrethimin e fabrikës së çelikut Azovstal. Në vitin 2022, 12 të burgosur ukrainas humbën jetën në një sulm me raketë në Olenivka, për të cilin Rusia dhe Ukraina akuzuan njëra-tjetrën.

Agjencia ukrainase e inteligjencës SBU dhe rrjeti Mirotvorets e akuzonin Yevsyukov për përdorimin e torturave fizike dhe psikologjike ndaj të burgosurve, përfshirë kërcënime për “vdekje të ngadaltë”. Për të, ishte shpallur një shpërblim prej 15,000 dollarësh nga rrjete ukrainase.

Disa javë para vdekjes së tij, Yevsyukov ishte promovuar si kryetar i komisionit të likuidimeve në Donetsk. Ngjarja ka ngritur pikëpyetje mbi sigurinë dhe përfshirjen e mundshme të forcave ukrainase në sulmin e fundit, megjithëse ende nuk ka konfirmime zyrtare mbi autorët e atentatit.