Pensionistët kanë protestuar sërish para Kryeministrisë, duke kërkuar rritjen e pensioneve për të përballuar koston e jetesës dhe shpenzimet e tyre shëndetësore. Protesta, e cila zgjati rreth një orë e gjysmë, përfshiu deklarata të ashpra ndaj qeverisë dhe masave të saj ekonomike.

Një pensionist, i cili merr 171 mijë lekë të vjetra pension, tha se shuma është krejtësisht e pamjaftueshme për përballimin e rritjes së çmimeve. Ai e quajti bonusin e ofruar nga qeveria një “mashtrim të madh” dhe akuzoi qeverinë për menaxhim të dobët të fondeve të kontributeve. “Ne nuk jemi derra,” deklaroi ai, duke theksuar se rrogat e larta të zyrtarëve janë në kontrast të fortë me situatën e pensionistëve.

Protesta e sotme është pjesë e një serie tubimesh të organizuara nga pensionistët dhe aktivistët e Lëvizjes Bashkë, që kërkojnë pensione dinjitoze dhe një minimum jetik të përshtatshëm për standardin e jetesës në Shqipëri.

Në shtator, Këshilli i Ministrave miratoi indeksimin e pensioneve me vetëm 4.1%, një masë që u prit me kritika të ashpra nga qytetarët dhe shoqëria civile. Sipas protestuesve dhe aktivistëve, ky indeksim është i pamjaftueshëm për të adresuar nevojat reale të pensionistëve, sidomos përballë inflacionit dhe rritjes së çmimeve në sektorët bazë të ekonomisë.

Protestuesit kanë theksuar nevojën për ndryshime strukturore në sistemin e pensioneve dhe për mbështetje më të madhe nga shteti ndaj shtresës së të moshuarve.