Një ngjarje e rëndë është regjistruar mbrëmjen e sotme në Selanik të Greqisë, ku një 24-vjeçar shqiptar ka rënë pre e një atentati me armë zjarri. Sipas mediave greke, incidenti ka ndodhur në rrugën “Egnatia”, pak para kabinave të pagesës në Oraiokastro, ku autori i atentatit ka qëlluar me armë ndaj të riut shqiptar, i cili ishte duke lëvizur me motoçikletë.

Ronaldo Pecaku, i lindur në Selanik dhe me origjinë nga Elbasani, ishte qëlluar në momentin që ishte futur në rrugën me pagesë, duke marrë disa plumba në bark. Pavarësisht plagëve të rënda, ai ka arritur të vazhdojë drejtimin e motoçikletës për disa metra, derisa ka rrëzuar në tokë pranë kabinës ku paguhet taksa e rrugës. Pas ngjarjes, ka qenë menjëherë e njoftuar ambulanca, e cila ka transportuar Pecakun në spital, ku raportohet se ai ndodhet në gjendje të rëndë.

Mediat greke gjithashtu kanë zbuluar se Pecaku kishte precedentë penalë në Greqi, ku ishte dënuar në vitin 2021 për vjedhje dhe ishte liruar nga burgu në muajin nëntor. Akoma nuk ka detaje mbi autorët e atentatit dhe motivet e mundshme të ngjarjes.