Një aksident ka ndodhur mbrëmjen e sotme në fshatin Bucimas të Pogradecit, ku një kamion ka goditur dhe dëmtuar rëndë transformatorin e energjisë elektrike në zonë. Grupet e punës të OSHEE kanë reaguar menjëherë dhe kanë mbërritur në vendngjarje për të nisur punën për riparimin e dëmit.

Sipas informacioneve të para, procesi i riparimit mund të zgjasë disa orë dhe po shqyrtohet mundësia e instalimit të një transformatori të ri në këtë zonë për të parandaluar ndërprerje të mundshme të furnizimit me energji.

Fatmirësisht, nuk janë raportuar persona të lënduar, megjithëse transformatori ndodhet shumë afër banesave, duke e bërë situatën më të rrezikshme. Aktualisht, forcat e policisë po punojnë për të identifikuar dhe gjetur drejtuesin e kamionit, i cili ka shkaktuar dëmin.