Kancelari gjerman Olaf Scholz ka garantuar refugjatët sirianë që janë integruar në shoqërinë gjermane se ata do të vazhdojnë të jenë të mirëpritur në vend, pavarësisht thirrjeve të partive konservatore dhe të ekstremit të djathtë për riatdhesimin e tyre pas rënies së Bashar al-Assad.

“Ai që punon këtu, që është integruar, është i mirëpritur në Gjermani, kjo është e qartë,” deklaroi Scholz, duke shtuar se disa deklarata të ditëve të fundit kanë shkaktuar shqetësim tek komuniteti sirian në Gjermani.

Rreth 1 milion sirianë jetojnë aktualisht në Gjermani, shumica e të cilëve emigruan pas shpërthimit të luftës civile në vitin 2011 dhe veçanërisht gjatë krizës së migracionit të vitit 2015. Disa prej tyre kanë fituar nënshtetësinë gjermane, por pjesa më e madhe ende mbetet pa këtë status dhe është e pambrojtur nga një mundësi deportimi.

Vendimi për fatin e refugjatëve erdhi në vëmendje pas rënies së regjimit të Bashar al-Assad, që ka ndryshuar dinamikat politike dhe qëndrimet ndaj azilkërkuesve sirianë në disa vende të Bashkimit Europian. Të hënën, Gjermania, Austria dhe Suedia njoftuan pezullimin e shqyrtimit të kërkesave për azil nga shtetasit sirianë, një masë që ka ngjallur shqetësime në radhët e komunitetit të refugjatëve.

Ndërkohë, kandidatja për kancelare e partisë ekstremiste të djathtë AfD, Alice Weidel, bëri thirrje për një politikë migratore më të ashpër. Në një postim në Platformën X (ish-Twitter), ajo deklaroi: “Nuk pranojmë më askënd!”

Kjo situatë ka ndezur një debat të ashpër mbi politikën e azilit në Gjermani dhe Europë, ndërsa Scholz mbron një qëndrim më humanitar për refugjatët që janë integruar dhe kontribuojnë në shoqëri.