Antonela Berisha ka komentuar për herë të parë mbi ngjarjen e rëndë në të cilën ajo dhe motra e saj, Mariela, u përfshinë pas sulmit ndaj Klea Prengës. Gjatë deklaratës së saj, Antonela ka ndarë detaje të reja mbi periudhën e vështirë që po kalon familja e saj.

Në një prononcim publik, Antonela ka adresuar gjithashtu zërat që lidhnin emrin e saj me të ashtuquajturën “çështja e Dubait.”

“Dua ta sqaroj një herë e mirë këtë çështjen e Dubait. Nuk kemi qenë atje. Ky është një informacion që mund të vërtetohet, pasi askush nuk mund të udhëtojë nëse është në verifikim. Ne nuk kemi qenë në Dubai,” tha ajo, duke hedhur poshtë spekulimet që e kanë ndjekur.

Ajo shtoi se përballja me opinionin publik dhe lajmet e rreme ka qenë shumë e vështirë, duke marrë mesazhe të shumta, disa prej të cilave shumë të rënda, veçanërisht ndaj motrës së saj.

“Mesazhi më i errët ka qenë për motrën time, për të cilën thonin se ishte e kërkuar për vrasje të mbetur në tentativë në Itali. Kjo ka qenë një goditje e madhe për ne, duke qenë se jetojmë në Itali dhe kemi nënshtetësinë atje,” tha Antonela, duke theksuar se akuzat kanë ndikuar thellë në mirëqenien e familjes së saj.

Ajo sqaroi se të dyja janë aktualisht nën masa sigurie: Antonela me detyrim paraqitjeje dhe motra e saj në arrest shtëpie, duke pranuar se ngjarja ka lënë pasoja të rënda psikologjike dhe ligjore.

“Kam keqardhje për gjithçka që ka ndodhur. Jemi njerëz dhe bëjmë gabime. Normalisht, nuk do të doja që kjo situatë të kishte ndodhur,” përfundoi ajo.