Lidhja Demokratike e Kosovës (LDK) ka njoftuar publikisht se disa llogari zyrtare të saj janë sulmuar në rrjetin social Instagram. Sipas njoftimit të bërë nga partia përmes platformës Facebook, janë prekur llogaritë e disa figurave kyçe të LDK-së, përfshirë liderin Lumir Abdixhiku, deputeten Doarsa Kica Xhelili, Paris Gurin, si dhe disa kandidatëve të tjerë për deputetë.
Në lidhje me këtë ngjarje, LDK-ja ka ndërmarrë masa të menjëhershme për të adresuar situatën. Partia theksoi se, mbrëmë vonë, ka informuar zyrtarët e Meta-s (kompania që menaxhon Instagramin) për aktivitetin e pazakontë, duke ofruar të gjitha detajet e nevojshme dhe duke kërkuar mbështetjen e tyre për të adresuar këtë çështje dhe për të siguruar që llogaritë e sulmuara të rikthehen sa më shpejt.
