Kryetarja e Parlamentit të Shqipërisë, Elisa Spiropali, gjatë fjalës së saj në takimin e dy Kuvendeve në Prishtinë më 20 dhjetor, shprehu mbështetje të plotë dhe të hapur për Kosovën në proceset e integrimit ndërkombëtar, duke theksuar anëtarësimin e Kosovës në NATO, Këshillin e Evropës, si dhe rrugën e saj drejt integrimit në Bashkimin Europian.
Spiropali u shpreh se Ballkani shpesh ka qenë një vend ku janë ngritur ankesa dhe shqetësime, por shqiptarët kanë dëshmuar vendosmëri të palëkundur për të transformuar shoqërinë e tyre në një shoqëri moderne dhe evropiane, duke qenë të orientuar euroatlantikisht. Ajo ftoi shtetarët kosovarë që të bashkëpunojnë dhe të diskutonin se si mund të bëjnë më mirë nesër në axhendën e përbashkët me frymëzim evropian.
“Ne shqiptarët nuk bëjmë dallim. Po në këtë moment historik, shqiptarët kanë dëshmuar vendosmëri të palëkundur në rrugëtimin e tyre për shndërrimin e shoqërisë në një shoqëri moderne, evropiane dhe euroatlantike,” tha Spiropali.
Ajo theksoi rëndësinë e bashkërendimit të planeve dhe strategjive për realizimin e objektivave strategjikë, përfshirë anëtarësimin e Shqipërisë në Bashkimin Evropian dhe integrimin e Kosovës në strukturat euroatlantike. Spiropali e cilësoi njohjen përfundimtare të Kosovës si një realitet të pakthyeshëm gjeopolitik dhe një mjet për forcimin e stabilitetit dhe paqes në rajon.
Kryetarja Spiropali përmendi marrëveshjen e nënshkruar mes dy Kuvendeve në shtator 2022, që ka institucionalizuar bashkëpunimin mes Shqipërisë dhe Kosovës, duke e mbështetur afrimin e njerëzve të dy vendeve dhe forcimin e marrëdhënieve mes qeverive dhe institucioneve.
“Kosova është prioritet kombëtar i Shqipërisë. Shqipëria është prioritet kombëtar i Kosovës,” tha Spiropali, duke shtuar se Shqipëria mbështet dhe do të vazhdojë të mbështesë pranimin e Kosovës në Këshillin e Europës. Ajo gjithashtu shprehu bindjen se Kosova ka plotësuar të gjitha kushtet për anëtarësim dhe se pranimi i saj në Këshillin e Europës është vetëm një çështje kohe.
Në fjalën e saj, Spiropali theksoi edhe angazhimin e Shqipërisë si anëtar i NATO-s, duke nënvizuar se forcimi i marrëdhënieve të Kosovës me Aleancën është një prioritet. Ajo u shpreh se NATO është garancia për sigurinë e Kosovës dhe gjithë rajonin, dhe qëndrimi i Shqipërisë është në mbështetje të përpjekjeve të Kosovës për garantimin e rendit dhe ligjit.
Spiropali gjithashtu u shpreh me shqetësim për “spiralen e destabilizimit” që po përjeton Veriu i Kosovës dhe tha se Shqipëria mbështet përpjekjet e Kosovës për të garantuar ligjin dhe rendin në çdo pjesë të territorit të saj. Ajo e cilësoi si “dalldira të së shkuarës” çdo frymëzim nacionalist që synon të mbajë peng Veriun e Kosovës dhe e lidh atë me makthe të së shkuarës.
