Tre persona janë arrestuar në fshatin Sanxhak të Kurbinit, pasi u zbuluan duke përdorur një lokal dhe një dyqan për konsumimin dhe shitjen e drogave, si dhe për organizimin e lojërave të fatit. Ndër të arrestuarit janë pronari i dy ambienteve, prindërit e tij dhe kamarieri i lokalit. Po ashtu, një 25-vjeçar është kapur në flagrancë duke konsumuar lëndë narkotike në ambientet e këtij lokali dhe do të hetohet në gjendje të lirë.

Policia bëri me dije se operacioni “Ambientet” u realizua pas informacioneve të siguruara nga inteligjenca policore. Pas kontrolleve të kryera, në lokalin e Sanxhakut u arrestuan pronari i lokalit, shtetasi V. R., 26 vjeç, prindërit e tij, shtetasit Gj. R., 67 vjeç, dhe M. R., 63 vjeçe, si dhe kamarieri, shtetasi R. I., 26 vjeç, të gjithë banues në këtë fshat.

Hetimet paraprake sugjerojnë se këta shtetas kishin përshtatur lokalin dhe dyqanin për konsumimin dhe shitjen e drogave të ndryshme. Po ashtu, ata kishin instaluar kompjuterë për lojëra fati. Pas kontrollit të ambienteve, policia sekuestruan 30 doza të lëndës narkotike “Cookies”, e dyshuar e sjellë nga Amerika Latine, 2 kg lëndë narkotike Kanabis Sativa, e ndarë në mijëra doza, 2 peshore elektronike, 3 kompjuterë, 3 celularë, disa fishekë, një shumë parash (në lekë dhe në euro), si dhe 6 ora dore të dyshuara të vjedhura.

Materialet e rastit i kaluan Prokurorisë Parë Lezhë për veprime të mëtejshme.