Kryetari i Partisë Demokratike, Sali Berisha, vazhdoi me akuza të ashpra ndaj Prokurorisë së Posaçme dhe kryeprokurorit të saj, Altin Dumani, gjatë një deklarate për mediat më 20 dhjetor. Ish-kryeministri, i cili është përfshirë në dosjen “Partizani” dhe ka qëndruar për një vit nën arrest shtëpiak, akuzoi Dumanin dhe Prokurorinë e Posaçme si pjesë të një organizate kriminale të lidhur ngushtë me partinë në pushtet. Berisha e quajti Dumanin “mercenar” dhe e akuzoi për manipulime në hetimet për krime elektoralë.

Sipas Berishës, Dumani merr një rrogë prej 100 milion lekë në vit dhe krahasoi shpenzimet e hetimeve të tij me ato të periudhës kur ai vetë ishte në pushtet. “Rroga e Altin Dumanit është 100 milion lekë, dhe ky njeri është duke fjetur mbi dosje krimi. Ky është një kriminel që amniston krimin elektoral, që është krim kushtetues,” tha Berisha.

Ai gjithashtu kritikoi procesin e hetimeve, duke thënë se krahasuar me vitin 2008, hetimet për krime elektoralë janë shumë më të kufizuara dhe më të shtrenjta. Berisha kërkoi një proces vlerësimi të punës së Dumanit dhe SPAK dhe premtuar të publikojë prova për amnistinë e krimeve elektoralë nga prokurorët e SPAK.

Berisha vazhdoi me akuzat edhe ndaj prokurores Elizabeta Keshi, që sipas tij, mbylli dosjen e lidhur me Ulsi Manjën dhe Edi Ramën, duke e bërë atë një pjesë të organizatës kriminale që ai pretendon se drejton Dumani. Ai gjithashtu akuzoi Dumanin për abuzim me sistemin e vettingut, duke e përdorur atë për të krijuar një grup mercenarësh që mbrojnë krimin elektoral.

Ish-kryeministri u shpreh se kundërshton zgjatjen e mandatit të prokurorëve të SPAK, duke theksuar se ata, përfshirë Dumanin, nuk meritojnë asnjë mundësi për të qëndruar në detyrë, pasi sipas tij, janë të lidhur me krimin elektoral. “Një që zbaton ligjin mund të garojë për 5 mandate, por kriminelët duhet të jenë në burg,” shtoi Berisha.

Në lidhje me vizitën e tij në Kosovë, Berisha shpjegoi se nuk mund të shkonte në Prishtinë për shkak të qëndrimeve të kryeministrit Edi Rama, i cili sipas tij, ka mbështetur projektet ruso-serbe dhe ka vepruar kundër interesave të Kosovës. Ai theksoi se nuk mund të shkonte në një takim pa kërkuar ndjesë për sanksionet që Shqipëria kishte vënë ndaj Kosovës dhe pa votuar rezolutën për dënimin e gjenocidit serb.

“Qëllimi i Ramës për takimet e dy Kuvendeve në Kosovë është antikombëtar dhe bllokues për zgjidhje,” tha Berisha, duke akuzuar kryeministrin shqiptar për bashkëpunim me Vuçiç dhe për përpjekje për të minuar dialogun me Serbinë.