Kryeministri Edi Rama zhvilloi një bisedë të ngrohtë dhe miqësore me skiatoren italiane Lara Colturi në podkastin e tij “Flasim”. Sportistja 18-vjeçare, e cila përfaqëson Shqipërinë prej tre vitesh në garat ndërkombëtare të skive, u vlerësua nga kreu i qeverisë si një ambasadore e jashtëzakonshme e sportit shqiptar.

Gjatë intervistës, Kryeministri Rama e ftoi skiatoren të vizitojë dhe të stërvitet në malet shqiptare, duke theksuar bukurinë dhe potencialin e tyre për sportet dimërore.
“Por duhet të flasësh me ato male e t’i dëgjosh ato, sepse kemi male shumë të bukura. Pastaj, tashmë është vendi yt,” tha Rama.

Nga ana e saj, Lara Colturi u shpreh e entuziazmuar për të kaluar më shumë kohë në Shqipëri dhe për të eksploruar mundësitë që ofron vendi për skiatorët profesionistë.

Në një moment humoristik, Rama u shpreh se Colturi nuk do t’i shpëtojë dot “gradës së gjenerales apo koloneles” në ushtrinë shqiptare si një kampione e padiskutueshme.
“Kjo do të ndjekë për gjithë jetën,” tha ai me buzëqeshje, duke i uruar suksese të mëtejshme në karrierën e saj sportive.

Colturi falënderoi Kryeministrin për mbështetjen dhe u shpreh se është e emocionuar për të vazhduar rrugëtimin e saj nën flamurin shqiptar.

Në përmbyllje të intervistës, Edi Rama i shprehu Lara Colturit urimet më të mira:
“Jam i lumtur që të kisha këtu dhe jam një adhurues i yti. Uroj të arrish të gjitha majat e botës. Të presim të kalosh pushimet në vendin tënd të dytë.”

Biseda mes tyre shënoi një moment pozitiv, duke reflektuar lidhjen e fortë të sportistes me Shqipërinë dhe mbështetjen institucionale për talentet ndërkombëtare që përfaqësojnë vendin në arenën globale.