Një 23-vjeçar shqiptar është arrestuar në Itali javën e kaluar për posedim dhe trafikim të kokainës, si dhe për mbajtje të paligjshme të një arme gjahu dhe 460 fishekëve të kalibrave të ndryshëm.
Seksioni antidrogë i Vareses kishte marrë informacione për aktivitetet e një shpërndarësi droge me origjinë ballkanike, i cili përdorte metoda të sofistikuara për të shmangur zbulimin nga autoritetet. Ai organizonte takimet përmes rrjeteve sociale dhe aplikacionit WhatsApp, duke përdorur një makinë tip ‘Golf’ me targa zvicerane për të kryer transaksionet.
Hetuesit ndoqën lëvizjet e tij për disa ditë dhe arritën të identifikonin automjetin dhe vendbanimin e të riut në një komunë pranë Vareses. Gjatë një ndjekjeje, i riu u përpoq të hidhte poshtë një pako të dyshimtë në një zgavër pranë një poste të hekurudhës, duke u shtirur sikur kishte nevoja personale. Pas kontrollit, autoritetet zbuluan 40 doza kokaine brenda pakos.
Pas ndalimit të automjetit dhe kontrollit fizik, policia gjeti edhe 20 doza të tjera kokaine dhe një shumë të madhe parash, që dyshohet se rrjedhin nga aktiviteti i paligjshëm i shitjes së drogës.
Kontrolli më pas u shtri edhe në banesën e të riut, ku në një çantë shpine të fshehur poshtë krevatit u gjetën 460 fishekë të kalibrave të ndryshëm. Ndërsa në dhomën e gjumit, pas një gardërobe, u zbulua një armë gjahu e prerë.
Ngjarja ka tronditur opinionin publik në Itali dhe autoritetet kanë nisur hetime të mëtejshme për të zbuluar nëse i riu ishte pjesë e një rrjeti më të gjerë kriminal.
