Shqipëria rrezikon të renditet në listën e shkurtër të vendeve që kanë mbyllur ose kufizuar TikTok-un jo për arsye privatësie apo mbrojtjeje të të dhënave, por për arsye të censurës shtetërore. Vende si Bangladeshi, Irani dhe Pakistani e kanë kufizuar këtë platformë me argumentin e parandalimit të përmbajtjeve të papërshtatshme. Ndërkohë, në SHBA, shqetësimet kanë qenë të lidhura me sigurinë kombëtare dhe përdorimin e të dhënave nga qeveria kineze.

Kryeministri Edi Rama deklaroi:

“Ne TikTok-un do e mbyllim për një vit. Kini parasysh që ne kemi bërë të gjithë hulumtimet tona në aspektin teknologjik dhe do të na duhen 6-8 javë nga fillimi i vitit të ardhshëm dhe për një vit do e mbyllim TikTok-un. TikTok nuk do ketë në Republikën e Shqipërisë.”

Ndërkohë, ministrja e Arsimit, Ogerta Manastirliu, e argumentoi vendimin me nevojën për “rritjen e sigurisë fizike dhe digjitale në shkolla” pas ngjarjes tragjike të vrasjes së nxënësit Martin Cani. Pas këtij incidenti, në TikTok qarkulluan video shqetësuese që ngritën alarmin për ndikimin e platformës te të rinjtë.

Megjithatë, dyshimet për një motiv elektoral mbeten të forta. Vendimi për mbylljen e TikTok-ut erdhi në prag të fushatës elektorale, në një kohë kur qeveria kontrollon pjesën dërrmuese të mediave tradicionale. Konsultimet publike mbi këtë vendim u panë nga shumë ekspertë si një farsë për të përligjur një vendim të paravendosur.

Debati global mbi TikTok mbetet i ndarë:

Kritikët argumentojnë për ndikimin negativ në shëndetin mendor dhe varësinë nga platforma.Mbështetësit e shohin atë si një mjet për krijimtari, arsim dhe zhvillim të bizneseve të reja.

Në këtë kontekst, vendimi i qeverisë shqiptare për të mbyllur TikTok-un ngre pikëpyetje të mëdha mbi motivet reale dhe efektivitetin e kësaj mase në adresimin e problemeve të sigurisë për fëmijët dhe të rinjtë.