Vendimi i Gjykatës Kushtetuese që rrëzoi ankimimin e partive të vogla për pavlefshmërinë e ndryshimeve të Kodit Zgjedhor të miratuara nga marrëveshja PS-PD ka shkaktuar pakënaqësi të theksuara. Grupi politik “Djathtas 1912” e ka quajtur këtë vendim një goditje për demokracinë, duke theksuar se ai i mohon qytetarëve të drejtën për të zgjedhur deputetët me lista të hapura. Sipas këtij grupimi, ndryshimi i sistemit zgjedhor ka qenë një kërkesë e vazhdueshme për një garë të ndershme dhe një parlament më të përgjegjshëm, ku deputetët të zgjidhen drejtpërdrejt nga qytetarët dhe jo nga liderët e partive.

Në deklaratën e tij, “Djathtas 1912” u shpreh se do të vazhdojnë të luftojnë për realizimin e listave të hapura dhe për zbatimin e një sistemi zgjedhor më demokratik. Ata theksuan se në zgjedhjet e 11 Majit do të garojnë me lista të hapura, duke dhënë shembullin për respektimin e vullnetit të qytetarëve dhe për ndërtimin e një parlamenti të vërtetë demokratik. Grupi gjithashtu apeloi për forcimin e konkurrencës politike dhe për çlirimin e parlamentit nga dominimi i binomit Rama-Berisha, të cilët, sipas tyre, kanë mbyllur hapësirat për konkurrencë të sinqertë.