Atmosfera festive shpesh na shpërqendron nga kujdesi për sigurinë kibernetike, por kjo periudhë është gjithashtu një mundësi e artë për mashtruesit online. Sipas të dhënave të Autoritetit Kombëtar për Sigurinë Kibernetike (AKSK), përgjatë vitit 2024 janë identifikuar 8,506 rrjedhje të dhënash, një shifër alarmante që reflekton rritjen e sulmeve financiare online.

Esmeralda Kazia, Drejtoresha e Monitorimit dhe Raportimit të Incidenteve Kibernetike, ka paralajmëruar qytetarët që të jenë veçanërisht vigjilentë në këtë periudhë:
“Jemi në një periudhë festash dhe kjo kohë është e artë për mashtruesit online. Gjatë 2024 kemi pasur shifra alarmante dhe një rritje të lartë të sulmeve financiare online.”

Rastet më të zakonshme të sulmeve kibernetike përfshijnë:

•Mesazhe dhe e-maile mashtruese me oferta që duken shumë të mira për të qenë të vërteta.
•Faqe të rreme blerjesh online që synojnë të vjedhin të dhëna financiare.
•Fjalëkalime të dobëta që lehtësojnë aksesin në llogaritë personale.

Këshillat nga AKSK për të shmangur sulmet kibernetike:

1.Mos klikoni në mesazhe ose e-maile të dyshimta.
2.Siguroni pajisjet tuaja me përditësime dhe softuerë mbrojtës.
3.Krijoni fjalëkalime të forta dhe unike për çdo llogari.
4.Bëni blerje vetëm nga platforma të besueshme dhe të certifikuara.

AKSK bën apel për raportimin e çdo aktiviteti të dyshimtë pranë autoriteteve përkatëse, duke theksuar se vigilenca dhe ndërgjegjësimi janë mbrojtja më e mirë kundër kërcënimeve kibernetike.